" Chi bella iurnata Vicè, chi nni rici si niscemu e niemu a fari na passiata a Marina?
" Sè Nonno. dammi sulu u tempu ca mi mettu i scarpi i tennis e arrivu..." Dopu n'anticchia, u Nonnu cu u niputi si mettinu a camminari manu e manuzza. Strata facennu Vice'ci rici o Nonno: " Talè Nonno chi bella Fiat uno, appena sugnu ranni e mi nsignu a guidare mi nn'accattu una, pero' io a vogghiu Turbo disel, accussì curri cchiu' fforti..." - u Nonnu: " Ti raccumannu, quannnu addiventi ranni un ti cunvinciri ca basta sà curriri ca macchina significa ca si un pilota ra Ferrari'!? A stari sempi accura a ccu camina mmenza a strada, specialmenti e picciriddi...u capisti'! - " Sè Nonno sta tranquillu e un ti proccupari". - Vice' e so' Nonno dopu na para i metri si fermanu nno gelataru e si pigghianu; Vicè un ghiacciolu e u Nonno na granita, paganu e ritornanu a caminari araciu araciu senza primura ncapu o marciaperi... Arrivati a Marina, u Nonnu si n'adduna ca Vicè avi piaciri i mittìrisi nna l'altalena. Accussì ccìa dumanna: " Vo iri nna l'altalena? - Vicè: " Sè Nonno, sulu un giru e poi ti giuru ca stai sulu cu ttia, Grazie. - " Un ti proccupari e v'addivertiti, però st'accura !". Dopu un quartu r'ura si vann'assettanu nto na panchina e Vicè, picciriddu svegliu u curiusu,taliannu i manu ru Nonnu chini ri caddi, ccìa dumanna: " Nonno, ma chi travagghiu facevi prima ca ti mannavanu npinsioni? " - " Eh o nonnu, io travagghiavu nfabbrica, a Fiat, chidda ri Termini Imerese, pi trentacincanni fuvu nne Pressi. Avìa un bilanceri rossu rossu c'aveva a fari girari pi ffari i pezza pi i macchini, e siddu i corpa cavìa a ddari unn'eranu abbastanza forti, pi mmia eranu camurrìe serie". - " Ma Nonno ci sunnu ancora ddì Pressi?"- " No, Vicè, pi furtuna i cosi canciaru, e ora ci sunnu Pressi automatichi e, un serbi cchiù usari a forza, basta sulu ca schiacci un buttuni..." - Mana a manu ca u nonnu eva cuntannu, Vicè arresta ncantatu e continua a farici domandi. - " Ma Nonno, a parti i Pressi, u sai si canciaru avutri cosi?" - " Sai, Vicè, na vota si faceva quasi tuttu chi i manu, poi quannu cuminciaru a serviri cchiù macchini pi i cristiani, s'attrizzaru pi accuntintalli. Tu dici, comu? Costruennu robott ca fannu u travagghiu ri reci vrazza; reci cristiani. Pensa ca na vota pi mpustari i tilara ri macchini, l'avèvamu ammuttari a una a una. Inveci ora ci sunnu i linee di montaggio e, l'operai unn 'annu cchiù bisognu i spustarli pi muntarici u volanti, i roti, u muturi, eccitira eccitira..." - " E' veru, nni stancavamu cchìossai ma pi colpa ri sti robott na pochi i patri i famigghia arristaru a casa picchì ormai un sirvevanu cchiù, mittennu i robott appostu ri cristiani..." - " Allura Nonno, pi cchistu tu ora un travagghi cchiu'?! - " No, Vicè, io ivu npinsioni pi l'eta'. Però un ti proccupari, un ponnu nvintari mai nuddu robott ca sapi fari u nonnu megghiu ri mia... ca ti porta a Marina, ca t'accatta u gelatu, ca t'aspetta quannu nesci ra scola, ma soprattuttu ca sà fira a vuliriti beni comu ti nni vogghiu io..."
Davide Trapanese
Nessun commento:
Posta un commento